Breaking

कॉम्रेड श्रीधर देशपांडे यांचे दु:खद निधन !


नाशिक : मार्क्सवादी कम्युनिस्ट पक्षाचे ज्येष्ठ नेते कॉम्रेड श्रीधर देशपांडे यांचे आज सकाळी सात वाजता कोरोना संसर्गामुळे निधन झाले. ‌गेल्या एक आठवड्यापासून ते आजारी होते. सुरुवातीला किर्लोस्कर हॉस्पिटल व नंतर कराड हॉस्पिटल मध्ये त्यांच्यावर उपचार सुरू होते. मध्यंतरीच्या काळात प्रकृती सुधारत असतानाच काल सायंकाळी त्यांची प्रकृती गंभीर होत गेली व आज सकाळी त्यांची प्राणज्योत मालवली. 


श्रीधर देशपांडे यांनी विमा कर्मचाऱ्यांचे नेते म्हणून सुमारे पाच दशके भरीव कार्य केले. त्याबरोबर डावे पुरोगामी संघटना यांच्याबरोबर त्यांचा घनिष्ठ संबंध होता. मार्क्सवादी कम्युनिस्ट पक्षाच्या व सिटू संघटनेमध्ये त्यांनी नेतृत्वदायी भूमिका बजावली. जिल्ह्यातील बंद पडलेल्या बँका व पतसंस्थांच्या ठेवीदारांच्या लढ्याचे त्यांनी नेतृत्व केले व न्याय मिळवून दिला. 

नाशिक शहरातील व जिल्ह्यातील विविध पक्ष व संघटनेतील नेत्या कार्यकर्त्यांबरोबर त्यांचे अत्यंत स्नेहाचे संबंध होते. ते कार्यकर्त्यांमध्ये लोकप्रिय होते. शेतकरी कामगार यांच्या चळवळी बरोबरच वर्तमानपत्रांमधून ते सातत्याने लिखाण करत असत. देशपांडे यांच्या निधनाने डाव्या पुरोगामी चळवळीची फार मोठी हानी झाली आहे.

"देशपांडे यांच्या निधनाने डाव्या पुरोगामी चळवळीची फार मोठी हानी झाली आहे. त्यांचा विचार, कार्य पुढे घेऊन जाण्यासाठी आम्ही सर्वच लढत आहेत. ते चळवळीचे आधारस्तंभ होते, असे दु:ख कामगार नेते डॉ. डी. एल. कराड यांनी व्यक्त केले.

तर कॉम्रेड राजू देसले म्हणाले, कामगार चळवळी साठी आयुष्य वेचणारे, नेहमी मला प्रोत्साहन देणारे नेते, कम्युनिस्ट ऐक्यसाठी आग्रही भूमिका असणारे नेते गेल्याचे दु:ख आहे.


कोणत्याही टिप्पण्‍या नाहीत:

टिप्पणी पोस्ट करा