.png "Former Jammu and Kashmir Governor Satya Pal Malik passes away")
Satyapal Malik Death : जम्मू-कश्मीर, बिहार, गोवा आणि मेघालय यासारख्या राज्यांचे माजी राज्यपाल आणि भारतीय राजकारणातील एक दिग्गज व्यक्तिमत्त्व सत्यपाल मलिक यांचे मंगळवारी, ५ ऑगस्ट २०२५ रोजी दिल्लीतील राम मनोहर लोहिया (RML) रुग्णालयात निधन झाले. वयाच्या ७९व्या वर्षी त्यांनी अखेरचा श्वास घेतला. गेल्या काही महिन्यांपासून ते किडनीच्या गंभीर आजाराने त्रस्त होते आणि मे २०२५ पासून रुग्णालयात दाखल होते.
सत्यपाल मलिक यांचा राजकीय प्रवास
सत्यपाल मलिक यांचा जन्म २४ जुलाई १९४६ रोजी उत्तर प्रदेशातील बागपत जिल्ह्यातील हिसवाडा गावात एका जाट शेतकरी कुटुंबात झाला. त्यांच्या वडिलांचे निधन त्यांच्या लहानपणीच झाले होते, त्यामुळे त्यांचा सांभाळ त्यांच्या आईने केला. मेरठ कॉलेजमधून विज्ञान शाखेची पदवी आणि कायद्याची पदवी (LLB) घेतल्यानंतर त्यांनी १९६८-६९ मध्ये मेरठ कॉलेजच्या विद्यार्थी संघटनेचे अध्यक्ष म्हणून आपल्या राजकीय कारकिर्दीला सुरुवात केली.
१९७४ मध्ये चौधरी चरण सिंह यांच्या भारतीय क्रांति दलाच्या तिकिटावर बागपत विधानसभा मतदारसंघातून निवडणूक जिंकून ते उत्तर प्रदेश विधानसभेचे सदस्य बनले. त्यानंतर १९८० ते १९८९ दरम्यान त्यांनी उत्तर प्रदेशचे राज्यसभेत प्रतिनिधित्व केले. १९८९ मध्ये जनता दलाच्या तिकिटावर ते अलिगडमधून लोकसभेचे खासदार म्हणून निवडून आले. त्यांनी समाजवादी विचारधारा, लोकदल, जनता दल आणि काही काळ काँग्रेस पक्षातही काम केले. नंतर ते भारतीय जनता पक्षात (BJP) सामील झाले आणि त्यांनी पक्षाचे राष्ट्रीय उपाध्यक्ष म्हणूनही जबाबदारी सांभाळली.
मलिक यांनी २०१७ ते २०२२ या कालावधीत बिहार, ओडिशा (अतिरिक्त प्रभार), जम्मू-कश्मीर, गोवा आणि मेघालय या राज्यांचे राज्यपाल म्हणून सेवा बजावली. विशेषतः जम्मू-कश्मीरचे राज्यपाल म्हणून त्यांचा कार्यकाळ (२३ ऑगस्ट २०१८ ते ३० ऑक्टोबर २०१९) अत्यंत महत्त्वाचा ठरला. याच काळात ५ ऑगस्ट २०१९ रोजी केंद्र सरकारने जम्मू-कश्मीरमधून कलम ३७० आणि ३५ए हटवले, आणि राज्याला केंद्रशासित प्रदेशाचा दर्जा दिला. हा निर्णय त्यांच्या कार्यकाळातील सर्वात महत्त्वाचा टप्पा मानला जातो.
सत्यपाल मलिक यांना मे २०२५ पासून किडनीच्या गंभीर आजाराने ग्रासले होते. त्यांना मूत्रमार्गाच्या संसर्गामुळे ११ मे २०२५ रोजी दिल्लीतील राम मनोहर लोहिया रुग्णालयात दाखल करण्यात आले होते.
Former-Jammu-and-Kashmir-Governor-Satya-Pal-Malik-passes-away