आळंदी (अर्जुन मेदनकर) : इंडियन कौन्सिल ऑफ मेडिकल रिसर्च (ICMR) आणि इंडियन असोसिएशन ऑफ प्रिव्हेंटिव्ह अँड सोशल मेडिसिन (IAPSM) यांच्या निर्देशानुसार, डॉ. डी. वाय. पाटील मेडिकल कॉलेज, हॉस्पिटल अँड रिसर्च सेंटर, पुणे येथील कम्युनिटी मेडिसिन विभागाच्या वतीने आरोग्य सेवा व पर्यावरण जनजागृती रॅलीचे आयोजन करण्यात आले.
ही रॅली दि. १ रोजी आळंदीतील वडगाव चौक येथून सुरु होऊन आरएचटीसी आळंदी (मरकळ रोड) येथे संपन्न झाली.
“United for Human, Animal and Environmental Well-being” या विषयावर आधारित या रॅलीत पर्यावरण संवर्धन, स्वच्छता आणि आरोग्य या विषयांवर जनजागृती करण्यात आली.
या प्रसंगी आळंदी नगरपरिषदेचे माजी उपाध्यक्ष सागर भोसले, आवेकर भावे रामचंद्र संस्थान श्रीराम मंदिर ट्रस्टचे विश्वस्त अर्जुन मेदनकर, कालिदास तापकीर, प्रसाद कवडे आदी मान्यवर उपस्थित होते.
रॅलीमध्ये वैद्यकीय अधिकारी, इंटर्न डॉक्टर्स, नर्सिंग विद्यार्थी, पॅरामेडिकल स्टाफ, पशुवैद्यकीय डॉक्टर, आशा कार्यकर्त्या, शालेय विद्यार्थी, ग्रामपंचायत सदस्य, सरपंच, पोलिस कर्मचारी, एनजीओ प्रतिनिधी, पत्रकार आणि स्थानिक नागरिक अशा सुमारे २०० हून अधिक सहभागींचा उत्स्फूर्त सहभाग होता.
रॅलीदरम्यान “स्वच्छ पर्यावरण - निरोगी जीवन” अशा घोषणा देत सहभागी नागरिकांनी समाज प्रबोधन केले. यावेळी विविध मान्यवरांनी मार्गदर्शन करत आरोग्य, पशुसंवर्धन आणि पर्यावरण संतुलनाचे महत्त्व अधोरेखित केले.