ग्रामदैवत हजेरी मारुती मंदिरात भाविकांची दर्शनास गर्दी
आळंदी (अर्जुन मेदनकर) : अलंकापुरीतील प्रथा परंपरांचे पालन करीत श्री हनुमान जन्मोत्सवाची ग्रामदैवत श्री हजेरी मारुती मंदिरात विविध धार्मिक कार्यक्रमांनी हरिनाम जय घोषासह गावकरी भजन सेवेने मंगलमय वातावरणात सांगता झाली.
जन्मोत्सवातील विविध कार्यक्रमात सोमनाथ महाराज भालेकर यांची सुश्राव्य कीर्तन सेवा रुजू झाली. या वेळी पंचक्रोशीतील भाविक, नागरिक, श्रींचे भक्तांची दर्शनास मोठी गर्दी झाली होती. हनुमान जन्मोत्सव दिनी हजारो भक्तांनी ग्रामदैवत श्री हजेरी मारुती मंदिरात रांगा लावत मारुतीरायांचे दर्शन घेतले. या वेळी भाविकांनी श्रींना श्रीफळ अर्पण करीत पूजा केली. भाविकांना दूध प्रसादाचे वाटप झाले. जन्मोत्सवा निमित्त मंदिरात आकर्षक विविध रंगी फुलांची लक्षवेधी सजावट करण्यात आली होती. मंदिरावर व परिसरात विद्युत रोषणाईने मंदिर लक्षवेधी सजले होते. भक्तिमय वातावरणात आळंदीकर ग्रामस्थ गावकरी भजनी मंडळाचे भजन सेवेने श्री हनुमान जन्मोत्सव सोहळ्याची सांगता रात्री उशिरा झाली. श्री हनुमान जन्मोत्सव विविध धार्मिक उपक्रमांनी उत्साहात साजरा झाला. पंचक्रोशीत धार्मिक वातावरण होते. या जन्मोत्सवात आळंदीकरांसह भाविक भक्तांनी नवशिवशक्ती तरुण मंडळाने भाविकांची सेवा सुविधा परिश्रम पूर्वक उपलब्ध करून देण्यास विशेष परिश्रम घेतले. माजी नगराध्यक्ष राहुल चिताळकर पाटील यांचे विशेष नियंत्रणात जन्मोत्सव साजरा झाला.या वेळी कीर्तनकार सोमनाथ महाराज भालेकर यांचा मंडळाचे वतीने मानपत्र देऊन सन्मान करण्यात आला. या वेळी आळंदी पोलीस स्टेशनचे वरिष्ठ पोलीस निरीक्षक भीमा नरके, पोलीस नाईक मच्छिन्द्र शेंडे, शांतता कमेटी सदस्य डी.डी.भोसले पाटील, वारकरी साधक विध्यार्थी, ग्रामस्थ मोठ्या संख्येने उपस्थित होते.
आळंदीकर ग्रामस्थ वारकरी सांप्रदायिक गावकरी भजनी मंडळाचे मार्गदर्शक पंडितराव रानवडे, कांताराम घुंडरे पाटील, रामदास महाराज उभे, नागनाथ अण्णा कांबळे, गव्हाणे महाराज, सुरेश दळवी, शिवाजी कारेकर गुरुजी, विशाल रानवडे, शाळीग्राम घाटोळ, सुधाकर जंगले, माउली घुंडरे पाटील यांचेसह आळंदीकर गावकरी ग्रामस्थ यांनी भजन सेवा देत श्री हनुमान जन्मोत्सवाची गावकरी भजन सेवेने हरिनाम गजरात सांगता केली.