सोसायटी फेडरेशनचा पुढाकार : अध्यक्ष संजीवन सांगळे यांची माहिती
पिंपरी-चिंचवड - पिंपरी चिंचवड शहरातील सहकारी गृहनिर्माण संस्था चालवताना येणाऱ्या अडचणींवर मार्गदर्शन देण्यासाठी पिंपरी-चिंचवड हाऊसिंग सोसायटी फेडरेशनतर्फे रविवारी 30 नोव्हेंबर रोजी “सहकार संवाद कार्यक्रम” आयोजित केला आहे.
शहरात सात हजार सहकारी गृहनिर्माण संस्था असून, अनेक कार्यकारी मंडळातील सदस्यांना सहकारी गृहरचना संस्था अधिनियम 1960, 1961 आणि त्याच्या उपविधींची माहिती नसते. त्यामुळे वार्षिक सर्वसाधारण सभा, ताळेबंद सादरीकरण, देखभाल खर्च वसुली, कन्व्हेन्स डिड, शेअर सर्टिफिकेट, सदस्यत्व आणि निवडणूक प्रक्रियेत अनेक चुका होत असून, यामुळे वाद निर्माण होतात.
या कार्यक्रमात सहकारी क्षेत्रातील तज्ज्ञ व्यक्ती उपस्थित राहून आदर्श उपविधी, ऑडिट, कर नियम, थकबाकी वसुली, सदस्य आणि कार्यकारी मंडळाच्या कर्तव्यांची सविस्तर माहिती देतील. कार्यक्रमास मा. श्री. मुकुंद पवार (सहाय्यक उपनिबंधक, पुणे 6), श्री. थिटे (सहाय्यक उपनिबंधक), कायदेविषयक सल्लागार ॲड. अजित बोराटे, प्रमाणित लेखापरीक्षक श्री. संजय काटे तसेच प्रमुख पाहुणे म्हणून लोकमतचे उपसंपादक श्री. ज्ञानेश्वर भंडारे उपस्थित राहणार आहेत.
फेडरेशनचे अध्यक्ष संजीवन सांगळे म्हणाले की, “सोसायटी चालवताना सहकारी गृहरचना संस्था अधिनियम व उपविधींचा अवलंब करणं अत्यंत आवश्यक आहे. या कार्यक्रमातून सर्व सदस्य आणि कार्यकारी मंडळाला योग्य मार्गदर्शन मिळेल. सर्व सोसायटीधारकांनी याचा लाभ घ्यावा.
प्रतिक्रिया :
“पिंपरी-चिंचवड शहरातील जवळजवळ सात हजार सहकारी गृहनिर्माण संस्थांमध्ये कार्यरत मॅनेजमेंट कमिटीच्या अनेक सदस्यांना सहकारी गृहरचना संस्था अधिनियम 1960 व 1961 मधील उपविधींची माहिती नसते. त्यामुळे सोसायटी चालवताना चुका होतात, वाद निर्माण होतात आणि न्यायालयीन प्रकरणांपर्यंत पोहोचतात. या सर्व अडचणी दूर करण्यासाठी रविवारच्या सहकार संवाद कार्यक्रमात तज्ज्ञांचे मार्गदर्शन मिळणार आहे. सर्व सोसायटीधारकांनी याचा नक्की लाभ घ्यावा.”
— संजीवन सांगळे, अध्यक्ष, पिंपरी चिंचवड हाऊसिंग सोसायटी फेडरेशन.