आमदार शंकर जगताप यांचे मुख्यमंत्री व उपमुख्यमंत्री यांना निवेदन
एकनाथ शिंदे यांनी नगर विकास विभागाच्या प्रधान सचिवांना दिले प्रस्ताव सादर करण्याचे आदेश
पिंपरी चिंचवड (क्रांतीकुमार कडुलकर) - पुणे जिल्ह्यातील मुळशी व मावळ तालुक्यातील हिंजवडी, माण, मारुंजी, नेरे, जांबे (ता. मुळशी) व सांगवडे, गहुंजे (ता. मावळ) या सात गावांचा पिंपरी-चिंचवड महापालिकेत समावेश करण्याच्या मागणीला आता गती मिळालेली आहे. या मागणीसंदर्भात चिंचवडचे आमदार मा. शंकर पांडुरंग जगताप यांनी मुख्यमंत्री देवेंद्र फडणवीस आणि उपमुख्यमंत्री तथा नगरविकास मंत्री एकनाथ शिंदे यांना अधिकृत निवेदन सादर केले.
या निवेदनाच्या अनुषंगाने मुख्यमंत्री देवेंद्र फडणवीस यांनी नगर विकास विभागाच्या प्रधान सचिवांना तात्काळ कार्यवाहीचे आदेश दिले, तर उपमुख्यमंत्री एकनाथ शिंदे यांनी प्रस्ताव सादर करण्याचे निर्देश संबंधित अधिकाऱ्यांना दिले आहेत. या बैठकीत खासदार श्रीरंग बारणे यांचीही उपस्थिती होती.
मागणी मागील प्रमुख कारणे:
राजीव गांधी आयटी पार्क आणि विविध औद्योगिक प्रकल्पांमुळे या भागात मोठ्या प्रमाणावर स्थलांतर व वस्ती
तरंगती लोकसंख्या सुमारे २ लाखांवर
मुलभूत नागरी सुविधांवरील वाढता ताण: पाणी, रस्ते, ड्रेनेज, कचरा व्यवस्थापन, आरोग्य
शासकीय यंत्रणांमध्ये समन्वयाचा अभाव व त्यामुळे रखडलेली विकासकामे
समावेश झाल्यास होणारे मुख्य फायदे:
एकसंध नागरी प्रशासनाखाली नियोजनबद्ध विकास
जलद निर्णयक्षम व समन्वित प्रशासन
वाहतूक व पायाभूत सुविधा क्षेत्रातील अडचणींवर ठोस उपाय
नागरिकांना आवश्यक सेवा एकाच छताखाली
आयटी व उद्योग क्षेत्राला प्रशासनाची साथ
शासनाच्या महसुलात वाढ
या मागणीसाठी २०१८ सालीच महापालिकेने ठराव करून शासनाकडे प्रस्ताव पाठवलेला आहे, मात्र अद्याप निर्णय झालेला नव्हता. आता मुख्यमंत्र्यांच्या व उपमुख्यमंत्र्यांच्या सूचनांमुळे या मागणीला गंभीरतेने विचारात घेतले जाऊन लवकरच ठोस निर्णय होण्याची शक्यता आहे.
या प्रसंगी आमदार जगताप यांच्यासमवेत वसंत साखरे, प्रकाश बुचडे, बाबासाहेब साखरे, आनंद बुचडे, तानाजी हुलावळे, दिलीप हुलावळे, लहू गायकवाड, संजय जाधव, रोहन जगताप, विक्रम साखरे, सचिन लोंढे, सचिन शिधे आदी ग्रामस्थ व कार्यकर्त्यांची उपस्थिती होती.
कोट
“या भागांचा विकास ग्रामपंचायतीच्या क्षमतेबाहेर गेला आहे. नागरिकांना मुलभूत सुविधा देण्यासाठी आणि नियोजनबद्ध नागरीकरणासाठी या गावांचा तातडीने पिंपरी-चिंचवड महापालिकेत समावेश होणे अत्यावश्यक आहे.”
— मा. शंकर पांडुरंग जगताप, आमदार, चिंचवड विधानसभा