“प्रत्येकाने आपल्या भविष्यासाठी एक झाड लावलेच पाहिजे” – महापौर रवी लांडगे यांचे आवाहन
पिंपरी चिंचवड : जागतिक पर्यावरण दिनानिमित्त पिंपरी-चिंचवड शहरात पर्यावरण संवर्धनाचा महत्त्वपूर्ण संदेश देणारा भव्य वृक्षारोपण उपक्रम आयोजित करण्यात आला आहे. पिंपरी-चिंचवडचे महापौर राविभाऊ लांडगे यांच्या पुढाकारातून “हरित पिंपरी चिंचवड” या संकल्पनेअंतर्गत दिनांक ५ जून रोजी सकाळी ७ वाजता निगडी येथील दुर्गा टेकडी परिसरात मोठ्या प्रमाणावर वृक्षारोपण मोहीम राबविण्यात येणार आहे.
या उपक्रमासाठी आवश्यक असलेली विविध प्रकारची रोपे पिंपरी चिंचवड महानगरपालिकेमार्फत उपलब्ध करून देण्यात येणार असून नागरिकांनी मोठ्या संख्येने उपस्थित राहून या पर्यावरणपूरक अभियानात सहभाग नोंदवावा, असे आवाहन करण्यात आले आहे.
सध्या वाढते तापमान, वायू प्रदूषण, कमी होत चाललेले जंगल क्षेत्र, अनियमित पाऊस आणि बदलते हवामान या गंभीर समस्या संपूर्ण जगासमोर उभ्या आहेत. अशा परिस्थितीत वृक्षारोपण हा पर्यावरण वाचविण्याचा सर्वात प्रभावी आणि सोपा मार्ग मानला जात आहे. झाडांमुळे वातावरणातील कार्बन डायऑक्साइड कमी होतो, ऑक्सिजनचे प्रमाण वाढते, उष्णतेची तीव्रता कमी होते तसेच भूजल पातळी सुधारण्यास मदत होते. झाडे मातीची धूप रोखतात, पक्षी व जैवविविधतेला आश्रय देतात आणि शहर अधिक सुंदर व आरोग्यदायी बनवतात.
महापौर रवी लांडगे यांच्या “हरित पिंपरी चिंचवड” या उपक्रमामुळे शहरात पर्यावरण जनजागृती निर्माण होत असून नागरिकांमध्ये वृक्षसंवर्धनाची भावना वाढीस लागली आहे. शहर हिरवेगार करण्यासाठी आणि येणाऱ्या पिढ्यांना स्वच्छ व सुरक्षित पर्यावरण देण्यासाठी हा उपक्रम महत्त्वपूर्ण ठरणार असल्याचे नागरिकांकडून सांगितले जात आहे.
आजच्या काळात फक्त झाडे लावणे पुरेसे नसून त्यांचे संगोपन करणेही तितकेच महत्त्वाचे आहे. प्रत्येक नागरिकाने आपल्या वाढदिवसाला, विशेष प्रसंगी किंवा कुटुंबातील आनंदाच्या क्षणी किमान एक झाड लावून त्याचे जतन केले, तर पर्यावरण संवर्धनाची मोठी चळवळ उभी राहू शकते.
तरी पिंपरी-चिंचवड शहरातील सर्व सामाजिक संस्था, स्वयंसेवी संघटना, निसर्गप्रेमी, पर्यावरणप्रेमी, युवक-युवती, विद्यार्थी तसेच नागरिकांनी या भव्य वृक्षारोपण मोहिमेत उत्स्फूर्त सहभाग नोंदवून पर्यावरण रक्षणासाठी आपले योगदान द्यावे, असे आवाहन आयोजकांच्या वतीने करण्यात आले आहे.
“एक झाड – हजारो श्वास”
“झाडे लावा, झाडे जगवा आणि भविष्यासाठी हिरवाई जपा!”