मुंबई : भारतातील सर्वात मोठी विमान सेवा कंपनी इंडिगोने नेटवर्क ऑप्टिमायझेशनचा भाग म्हणून सहा आंतरराष्ट्रीय गंतव्यांसाठीची उड्डाणे तात्पुरती स्थगित करण्याचा निर्णय घेतला आहे. यामध्ये हाँगकाँग आणि क्राबी यांसारख्या लोकप्रिय ठिकाणांचाही समावेश आहे.
कंपनीच्या निवेदनानुसार, 1 जुलैपासून लंगकावी, क्राबी, हो ची मिन्ह सिटी, हाँगकाँग आणि शांघाय या मार्गांवरील सेवा 30 सप्टेंबरपर्यंत बंद राहतील. तसेच, सिएम रीपसाठीची सेवा 3 जुलैपासून 30 सप्टेंबरपर्यंत स्थगित करण्यात येणार आहे.
इंडिगोने सांगितले की, आगामी तिमाहीत अपेक्षित कमी प्रवासी मागणी आणि वाढत्या परिचालन खर्चामुळे हा निर्णय घेण्यात आला आहे.
कंपनीने स्पष्ट केले आहे की, परिस्थितीत सुधारणा झाल्यास या मार्गांवरील बुकिंग 1 ऑक्टोबरपासून पुन्हा सुरू करण्यात येतील. तसेच, अनुकूल परिस्थिती निर्माण झाल्यास नियोजित वेळेपूर्वीही सेवा पुन्हा सुरू करण्याची तयारी कंपनीने दर्शवली आहे.
या फेरबदलानंतरही इंडिगोच्या बहुतांश आंतरराष्ट्रीय सेवा कायम राहणार असून, कंपनी दर आठवड्याला 1,800 हून अधिक आंतरराष्ट्रीय उड्डाणे चालवत राहील.
कंपनीच्या मते, सध्याच्या बाजारपेठेतील परिस्थिती, प्रवासी मागणीतील बदल, वाढलेले परिचालन खर्च आणि काही हवाई क्षेत्रांवरील निर्बंध लक्षात घेऊन क्षमता आणि सेवा यांचा समतोल राखण्यासाठी हे पाऊल उचलण्यात आले आहे.
इंडिगोने पुढे सांगितले की, परिस्थितीवर सतत लक्ष ठेवले जाईल आणि आवश्यकतेनुसार पुढील निर्णय घेतले जातील.