पिंपरी-चिंचवड सोशल फाउंडेशन, स्वातंत्र्यवीर सावरकर मंडळ अंतर्गत संस्कृती संवर्धन व विकास महासंघ, पिंपरी-चिंचवड तसेच भजनी मंडळ महासंघ, चिंचवड यांच्या संयुक्त विद्यमाने, महाराष्ट्र शासनाच्या सांस्कृतिक विभागाच्या सहकार्याने आयोजित "नारीशक्ती महोत्सवा मध्ये विठु रंगला" हा सांस्कृतिक सोहळा आज प्रा. रामकृष्ण मोरे प्रेक्षागृह, चिंचवड येथे अत्यंत उत्साहपूर्ण, भक्तिमय आणि प्रेरणादायी वातावरणात संपन्न झाला.
या महोत्सवात विविध भजनी मंडळांनी अभंग, गोंधळ, गौळण, नारीशक्तीवर आधारित सादरीकरणे, भारुडे आणि पारंपरिक सांस्कृतिक कलाप्रकार अत्यंत सुरेख पद्धतीने सादर करून उपस्थितांची मने जिंकली. विविध पारंपरिक वेशभूषा परिधान केलेल्या महिला भगिनींनी आपल्या सादरीकरणातून महाराष्ट्राची समृद्ध सांस्कृतिक परंपरा, संतवाङ्मयाची भक्ती आणि स्त्रीशक्तीचे तेजस्वी दर्शन घडविले.
कार्यक्रमाला मा. आमदार सौ. उमाताई खापरे यांनी दिवसभर उपस्थित राहून सर्व महिला कलाकार, भजनी मंडळे आणि आयोजकांचे मनापासून कौतुक केले. त्यांनी आपल्या प्रेरणादायी मार्गदर्शनातून महिलांनी सांस्कृतिक, सामाजिक आणि आध्यात्मिक क्षेत्रात अधिक सक्रिय सहभाग घ्यावा, अशी अपेक्षा व्यक्त केली. त्यांच्या उपस्थितीमुळे कार्यक्रमाला विशेष उंची प्राप्त झाली आणि सर्व महिला भगिनींना नवचैतन्य मिळाले.
या महोत्सवातून नारीशक्तीचा सन्मान, संत परंपरेचा गौरव, भक्तीचा जागर आणि महाराष्ट्राच्या लोकसंस्कृतीचे जतन करण्याचा सुंदर संदेश समाजापर्यंत पोहोचला. संस्कृती ही केवळ जपण्याची नव्हे, तर ती पुढील पिढीपर्यंत अभिमानाने पोहोचवण्याची सामूहिक जबाबदारी आहे, याची जाणीव या कार्यक्रमाने सर्वांना करून दिली.
कार्यक्रमाच्या यशस्वी आयोजनासाठी सौ. उमाताई खापरे, सौ. माधुरीताई कवी, सौ. उज्वलाताई कवडे, श्रीमती अश्विनीताई नाटेकर, श्रीमती प्रियाताई जोग, श्रीमती अंजलीताई कुलकर्णी, सौ. सुषमाताई वैद्य, डॉ. अजित जगताप तसेच सर्व भजनी मंडळे, स्वयंसेवक आणि सहभागी महिला भगिनी यांचे मनःपूर्वक अभिनंदन व हार्दिक आभार.
अशा सांस्कृतिक उपक्रमांमुळे आपल्या परंपरा अधिक दृढ होत असून, समाजात भक्ती, संस्कार, समता आणि महिला सक्षमीकरणाचा संदेश अधिक प्रभावीपणे पोहोचत आहे. भविष्यातही अशाच प्रेरणादायी उपक्रमांमधून आपल्या संस्कृतीचा वारसा अधिक समृद्ध होत राहो, हीच सदिच्छा.