पिंपरी चिंचवड (शिवानंद चौगुले) : महात्मा फुले नगर, चिंचवड येथील ओम शांती गंगा ज्येष्ठ नागरिक संघाच्या विरंगुळा केंद्रात आदित्य बिर्ला मेमोरियल हॉस्पिटल आणि ओम शांती गंगा ज्येष्ठ नागरिक संघ यांच्या संयुक्त विद्यमाने आयोजित करण्यात आलेले मोफत आरोग्य तपासणी शिबिर रविवार, ४ ऑक्टोबर रोजी उत्साहात संपन्न झाले. या शिबिरात परिसरातील सुमारे ६० नागरिकांनी सहभाग घेत आरोग्य तपासणीचा लाभ घेतला.
या शिबिरामध्ये जनरल फिजिशियन सल्ला, रक्तातील साखरेची तपासणी, रक्तदाब, उंची, वजन, बॉडी कंपोझिशन अ‍ॅनालिसिस तसेच ईसीजी अशा विविध तपासण्या करण्यात आल्या. विशेष म्हणजे, अनेक नागरिकांचे ईसीजीही करण्यात आले. यावेळी नागरिकांना त्यांच्या आरोग्यविषयक तक्रारी, आरोग्याची नियमित काळजी, योग्य जीवनशैली आणि आजारांचे वेळीच निदान यासंदर्भात तज्ज्ञांकडून उपयुक्त मार्गदर्शन करण्यात आले.
आदित्य बिर्ला मेमोरियल हॉस्पिटलच्या वतीने अंबादास काटकर (इन्चार्ज), डॉ. अमोल रेनगुंटवार, सी. जेनी, दीपाली कांबळे, सुप्रिया गायकवाड तसेच हॉस्पिटलच्या कर्मचाऱ्यांनी शिबिर यशस्वी करण्यासाठी विशेष योगदान दिले.
याप्रसंगी ओम शांती गंगा ज्येष्ठ नागरिक संघाचे अध्यक्ष यशवंत कन्हेरे यांच्यासह संघाचे सर्व पदाधिकारी, सदस्य आणि यमुना नगर स्टेशनरी संघाचे श्री. ढमाले उपस्थित होते. संघाच्या वतीने आरोग्यसेवेच्या माध्यमातून सामाजिक बांधिलकी जपणाऱ्या डॉक्टरांचा आणि हॉस्पिटलच्या पथकाचा सन्मान करून कृतज्ञता व्यक्त करण्यात आली.
ज्येष्ठ नागरिकांच्या आरोग्याची काळजी घेणे ही समाजाची सामूहिक जबाबदारी
आजच्या धावपळीच्या जीवनात आरोग्याकडे दुर्लक्ष होत असताना विशेषतः ज्येष्ठ नागरिकांसाठी अशा मोफत आरोग्य तपासणी शिबिरांचे महत्त्व अधिक आहे. आजाराचे वेळीच निदान, नियमित तपासणी आणि योग्य वैद्यकीय मार्गदर्शन यामुळे अनेक गंभीर आरोग्यविषयक समस्या टाळण्यास मदत होऊ शकते. केवळ मनोरंजन आणि विरंगुळा यापुरते मर्यादित न राहता ज्येष्ठ नागरिक संघ सामाजिक आणि आरोग्यविषयक उपक्रमांतूनही समाजासाठी योगदान देत असल्याचे या शिबिरातून अधोरेखित झाले.
निरोगी आरोग्य, आनंदी जीवन आणि सामाजिक बांधिलकी या त्रिसूत्रीचा संदेश देणारे हे शिबिर नागरिकांच्या उत्स्फूर्त सहभागामुळे यशस्वी ठरले.