अहमदाबाद : अमेरिकन शॉर्ट-सेलर हिंडेनबर्ग रिसर्चच्या आरोपांनंतर दीड वर्षांच्या तपासानंतर सेबीने (सिक्युरिटीज अँड एक्सचेंज बोर्ड ऑफ इंडिया) अदानी ग्रुप आणि चेयरमन गौतम अदानी यांना क्लिन चिट दिली आहे. २४ जानेवारी २०२३ रोजी जारी झालेल्या हिंडेनबर्गच्या अहवालात अदानी ग्रुपवर शेअर मॅनिप्युलेशन, फसवणूक, संबंधित पक्षीय व्यवहार (आरपीटी) नियमांचे उल्लंघन आणि ऑफशोअर शेल कंपन्यांचा वापर करून शेअर किंमती कृत्रिमरित्या वाढवण्याचे आरोप करण्यात आले होते.
सेबीचा तपास आणि क्लिन चिटचे तपशील
सेबीने गुरुवार (१८ सप्टेंबर) रोजी वेबसाइटवर दोन वेगवेगळ्या आदेश जारी केले, ज्यात अदानी ग्रुपच्या प्रमुख कंपन्या – अदानी एंटरप्रायझेस, अदानी पोर्ट्स अँड एसईझेड, अदानी पॉवर, अॅडिकॉर्प एंटरप्रायझेस प्रा. लि., मिलेस्टोन ट्रेडलिंक्स प्रा. लि. आणि रेहवार इन्फ्रास्ट्रक्चर प्रा. लि. – यांना क्लिन चिट देण्यात आली आहे. तपास फायनान्शियल इयर २०१३ ते २०२१ पर्यंतचा होता. सेबीने नमूद केले की, या व्यवहारांना 'संबंधित पक्षीय व्यवहार' (आरपीटी) म्हणून ओळखता येत नाहीत, त्यामुळे लिस्टिंग करार किंवा सेबी नियमांचे उल्लंघन झालेले नाही.
हिंडेनबर्गने आरोप केला होता की, अदानी ग्रुपने अॅडिकॉर्प, मिलेस्टोन आणि रेहवार या कंपन्यांचा वापर करून अदानी पॉवर आणि अदानी एंटरप्रायझेसमध्ये पैसे वळवले, ज्यामुळे गुंतवणूकदारांना फसवले गेले. मात्र, सेबीच्या तपासात असे आढळले की, अदानी पोर्ट्सने अॅडिकॉर्पला कर्ज दिले, जे नंतर अदानी पॉवरला दिले गेले आणि दोन्ही कर्ज व्याजासह परतफेड करण्यात आली. हे व्यवहार व्यावसायिक स्वरूपाचे आणि पारदर्शक होते. सेबीने इन्सायडर ट्रेडिंग, मार्केट मॅनिप्युलेशन आणि पब्लिक शेअरहोल्डिंग नियमांचे उल्लंघन यांसारखे आरोपही खोडून काढले.
तपासानंतर सेबीने आम्ही नेहमी सांगितल्याप्रमाणे पुष्टी केली आहे की, हिंडेनबर्गचे आरोप बोगस होते, असे गौतम अदानी यांनी एक्सवर पोस्ट केले. त्यांनी पुढे म्हटले, "पारदर्शकता आणि अखंडता ही अदानी ग्रुपची ओळख आहे. या फसवणूकपूर्ण अहवालामुळे गुंतवणूकदारांना झालेल्या नुकसानीची आम्हाला खंत आहे. खोट्या कथा पसरविणाऱ्यांनी राष्ट्राची माफी मागावी. आमचा भारताच्या संस्था, लोक आणि राष्ट्रनिर्माणासाठीचा वचनबद्धपणा अटल आहे. सत्यमेव जयते! जय हिंद!
शेअर बाजारावर सकारात्मक परिणाम
सेबीच्या क्लिन चिटनंतर अदानी ग्रुपच्या शेअरमध्ये जोरदार तेजी दिसून आली. शुक्रवारी (१९ सप्टेंबर) अदानी एंटरप्रायझेस, अदानी पॉवर, अदानी ग्रीन एनर्जी, अदानी टोटल गॅस, अदानी पोर्ट्स यांसारख्या कंपन्यांच्या शेअरमध्ये ५ ते १० टक्क्यांपर्यंत वाढ नोंदवली गेली. हा अहवाल जारी झाल्यानंतर अदानी ग्रुपचे मार्केट कॅपिटलायझेशन १५० अब्ज डॉलरने घसरले होते, जे आता बऱ्यापैकी सावरले आहे.
SEBI-gives-clean-chit-to-Adani-in-Hindenburg-case