रहिवाशांचा पालिका प्रशासनावर आर्थिक हातभाराचा आरोप!
पिंपरी चिंचवड : चिंचवड येथील केशवनगर, काकडे टाऊनशिप वसाहतीच्या समोर गेल्या वर्षभरापासून अनाधिकृतपणे मोठ्या प्रमाणात घनकचरा, घाण, आरोग्यास हानिकारक माती, राडा-रोडा राजरोसपणे टाकला जात असल्याने परिसरातील नागरिकांचे आरोग्य वारंवार बिघडत आहे. या गैरप्रकाराबाबत पालिकेत वारंवार तक्रारी करूनही कोणतीही कारवाई होत नसल्यामुळे, सदर कामांमध्ये पालिकेच्या संबंधित अधिकाऱ्यांचा आर्थिक हातभार असावा, असा थेट संशय परिसरातील रहिवाशांनी व्यक्त केला आहे.
परिणामी, हे ठिकाण अक्षरशः डम्पिंग ग्राउंड बनले आहे. या भागाच्या चारही बाजूंनी मोठ्या प्रमाणात नागरिक वस्ती करत असूनही हा गैरप्रकार राजरोसपणे सुरू आहे. यामुळे परिसरात कमालीची दुर्गंधी पसरली असून सर्व नागरिकांचे आरोग्य धोक्यात आले आहे.
महावितरण समिती सदस्यांचा ट्रॅक्टर, डंपर चालकांना जाब
या गंभीर प्रकाराची दखल घेत महावितरण समिती सदस्य मधुकर बच्चे आणि स्थानिक रहिवाशांनी आज (दिनांक) त्या ठिकाणी धाव घेतली. त्यांनी राडा-रोडा टाकणाऱ्या ट्रॅक्टर आणि डंपर चालकांना जाब विचारला. आंदोलनाचा इशारा
यावेळी मधुकर बच्चे यांनी पालिका प्रशासनाला कडक शब्दात इशारा दिला आहे. "जर हा असाच प्रकार चालू राहिला, तर त्या ठिकाणी नागरिकांचा उद्रेक निश्चित आहे," असे त्यांनी स्पष्ट केले.
"पुढील चार ते पाच दिवसांत जर सदर ठिकाणी कोणतीही कार्यवाही झाली नाही, तर सर्व रहिवाशांच्या वतीने त्या ठिकाणी अनोखे आंदोलन केले जाईल," असा इशाराही त्यांनी दिला आहे.
# रहिवाशांची मागणी
रहिवाशांच्या वतीने मधुकर बच्चे यांनी संबंधित अधिकारी व आयुक्तांनी या प्रकरणाची त्वरित दखल घ्यावी अशी मागणी केली आहे. तसेच, त्या ठिकाणी तातडीने दंडात्मक कारवाई करून, तो सर्व राडा-रोडा मार्गी लावावा आणि पुढील काळात या ठिकाणी असे कुठलेही आरोग्यास हानिकारक डंपिंग होऊ नये याची काळजी घ्यावी, अशी मागणी केली आहे.
मधुकर बच्चे
(महावितरण समिती सदस्य व रहिवासी)