पिंपरी-चिंचवड : पिंपरी चिंचवड महानगरपालिका (PCMC) च्या आयुक्तपदी वरिष्ठ आयएएस अधिकारी डॉ. विजय सुर्यवंशी यांची नियुक्ती करण्यात आली आहे. राज्य शासनाने नुकताच याबाबत आदेश काढला असून अनुभवी आणि कणखर प्रशासक म्हणून ओळख असलेल्या सुर्यवंशी यांच्या नियुक्तीमुळे पिंपरी-चिंचवड शहरातील विकासकामांना नवी दिशा आणि गती मिळण्याची अपेक्षा व्यक्त केली जात आहे.
डॉ. विजय सुर्यवंशी हे 2006 बॅचचे आयएएस अधिकारी असून त्यांनी व्यवस्थापन विषयात एमबीए तसेच पीएचडीचे उच्च शिक्षण घेतले आहे. प्रशासनातील व्यापक अनुभव आणि अभ्यासू वृत्तीमुळे ते राज्यातील सक्षम व परिणामकारक अधिकारी म्हणून ओळखले जातात. यापूर्वी त्यांनी कल्याण-डोंबिवली महानगरपालिका चे आयुक्त म्हणून काम करताना अनेक महत्त्वपूर्ण निर्णय घेतले. शहरातील पायाभूत सुविधा, वाहतूक व्यवस्थापन आणि शहरी विकासाच्या प्रकल्पांना त्यांनी गती दिली होती.
तसेच त्यांनी कोकण विभाग चे विभागीय आयुक्त म्हणूनही जबाबदारी सांभाळली असून विविध प्रशासकीय सुधारणांमध्ये त्यांनी महत्त्वाची भूमिका बजावली आहे. याशिवाय ठाणे जिल्हा परिषद येथे मुख्य कार्यकारी अधिकारी म्हणून ग्रामीण विकास, शिक्षण, आरोग्य आणि पाणीपुरवठा योजनांमध्ये प्रभावी अंमलबजावणी करून त्यांनी आपली कार्यक्षमता सिद्ध केली आहे.
दरम्यान, पिंपरी-चिंचवड हे राज्यातील सर्वात वेगाने विकसित होणाऱ्या शहरांपैकी एक मानले जाते. शहरात मोठ्या प्रमाणावर औद्योगिक, निवासी आणि व्यापारी विस्तार होत असल्यामुळे पायाभूत सुविधा मजबूत करणे ही प्रशासनासमोरील मोठी जबाबदारी आहे. मेट्रो प्रकल्प, वाहतूक कोंडी कमी करण्यासाठीचे उपाय, रस्ते विकास, स्मार्ट सिटी योजना, पाणीपुरवठा व्यवस्था, पर्यावरण संवर्धन आणि नागरी सुविधा या अनेक महत्त्वाच्या प्रकल्पांना गती देण्याचे मोठे आव्हान नव्या आयुक्तांसमोर असणार आहे.
शहरातील नागरिकांच्या अपेक्षा देखील मोठ्या असून प्रलंबित विकासकामे पूर्ण करणे, प्रशासनातील पारदर्शकता वाढवणे आणि नागरिकाभिमुख निर्णय घेणे यावर विशेष भर देण्याची गरज आहे. डॉ. सुर्यवंशी यांच्या अनुभवाचा आणि अभ्यासू दृष्टिकोनाचा शहराच्या सर्वांगीण विकासासाठी निश्चितच उपयोग होईल, असा विश्वास अनेक नागरिक व सामाजिक कार्यकर्त्यांकडून व्यक्त करण्यात येत आहे.
— महाराष्ट्र जनभूमी वार्ताहर : शिवानंद चौगुले