पुणे, ७ ऑगस्ट: मुंबई-पुणे द्रुतगती मार्गावरील मिसिंग लिंक बोगद्यात शुक्रवारी पहाटे झालेल्या भीषण अपघातात वाकड येथील युवा राजकीय नेते उद्योजक, तुषार भूमकर (वय ३०–३५) यांचा मृत्यू झाला. भरधाव वेगाने धावणाऱ्या टोयोटा फॉर्च्युनरने पुढे जाणाऱ्या आयशर टेम्पोला मागून जोरदार धडक दिल्याने हा अपघात झाला.
हा अपघात पहाटे सुमारे १.२० वाजता खंडाळा ट्रॅफिक एड पोस्ट (TAP) हद्दीत, महामार्ग सुरक्षा पथक (HSP), पुणे परिक्षेत्राच्या कार्यक्षेत्रात घडला.
महामार्ग सुरक्षा पथकाने दिलेल्या प्राथमिक माहितीनुसार, फॉर्च्युनर मुंबईच्या दिशेने जात असताना तिने आयशर टेम्पोला मागून धडक दिली. अतिवेग हेच अपघाताचे प्रमुख कारण असल्याचा प्राथमिक अंदाज पोलिसांनी व्यक्त केला आहे. धडकेची तीव्रता इतकी होती की दोन्ही वाहने उलटली.
या अपघातात तुषार भूमकर यांचा घटनास्थळीच मृत्यू झाला. फॉर्च्युनरमधील इतर चार प्रवाशांना किरकोळ दुखापती झाल्या असून टेम्पोतील प्रवासीही किरकोळ जखमी झाले आहेत.
अपघातानंतर बचाव पथके आणि एमएसआरडीसीची रुग्णवाहिका तातडीने घटनास्थळी दाखल झाली. जखमींना जवळच्या रुग्णालयात उपचारासाठी दाखल करण्यात आले. पोलिसांनी बचावकार्य पूर्ण करून अपघातग्रस्त वाहने हटवली, त्यामुळे द्रुतगती मार्गावरील वाहतूक सुरळीत ठेवण्यात यश आले.
मिसिंग लिंक बोगद्यातील वाढता वेग चिंतेचा विषय
नव्याने सुरू झालेल्या मिसिंग लिंक बोगद्यात अनेक वाहनचालक अतिवेगाने वाहन चालवत असल्याच्या घटना वाढत आहेत. महामार्ग प्रशासनाच्या वारंवार सूचना असूनही वेगमर्यादेचे उल्लंघन होत असल्याने सुरक्षेबाबत पुन्हा एकदा चिंता व्यक्त केली जात आहे.
या अपघाताचा पुढील तपास पोलिसांकडून सुरू असून, प्राथमिक तपासात अतिवेगामुळेच हा अपघात झाल्याचे समोर आले आहे.