एक हजार नवीन वृक्षांचे आगमन; हजारो नागरिक, विद्यार्थी आणि पर्यावरणप्रेमींचा उत्स्फूर्त सहभाग
पिंपरी चिंचवड :जागतिक पर्यावरण दिनानिमित्त इंद्रायणी नगर, भोसरी येथील जंगल गार्डनमध्ये आज सकाळी ६ वाजल्यापासून भव्य वृक्षारोपण सोहळा उत्साहपूर्ण वातावरणात संपन्न झाला. या उपक्रमाअंतर्गत एक हजार नवीन वृक्षांचे आगमन होऊन त्यांची लागवड करण्यात आली. पर्यावरण संवर्धनाचा संदेश देणाऱ्या या कार्यक्रमात विविध सामाजिक संघटना, शैक्षणिक संस्था, महानगरपालिका प्रशासन, ज्येष्ठ नागरिक, विद्यार्थी आणि नागरिक मोठ्या संख्येने सहभागी झाले.
या उपक्रमात सामाजिक कल्याण एवं मानव संरक्षण संघ, अथर्व वॉटर टेक सोल्युशन्स पुणे, वृक्ष व संवर्धन समिती, ज्येष्ठ नागरिक संघ, भूगोल फाउंडेशन, वृक्षमित्र संघटना, इंटेलिजन्स स्कूल इंद्रायणी नगर, रोटरी क्लब डायनॅमिक भोसरी, व्यसनमुक्ती केंद्र टीम, ओम शांती ध्यान केंद्र, सहजयोग परिवार, मेडिकव्हर हॉस्पिटल टीम यांच्यासह अनेक संस्था सहभागी झाल्या.
कार्यक्रमास पिंपरी चिंचवडचे प्रथम नागरिक महापौर मा. श्री. रवी बाबासाहेब लांडगे, राष्ट्रपती सन्मान प्राप्त वृक्षप्रेमी मा. श्री. रमेश खरमाळे सर, नगरसेवक मा. श्री. तुषारभाऊ सहाणे, भूगोल फाउंडेशनचे श्री. विठ्ठल नाना वाळुंज, सामाजिक कल्याण एवं मानव संरक्षण संघाचे उत्तर महाराष्ट्र अध्यक्ष श्री. रविंद्र भाऊसाहेब आळणे, सामाजिक कार्यकर्ते श्री. विश्वनाथ टेमगिरे, मेजर डावखर सर, श्री. संतोष दौंडकर, श्री. गुलचंद लोखंडे, डॉ. मोरे सर यांच्यासह अनेक मान्यवर उपस्थित होते. हजारो विद्यार्थी आणि ज्येष्ठ नागरिकांनी देखील या कार्यक्रमात उत्स्फूर्त सहभाग नोंदविला.
कार्यक्रमाच्या प्रारंभी _श्री. रविंद्र भाऊसाहेब आळणे_ यांनी उपस्थितांचे स्वागत केले. यावेळी बोलताना त्यांनी बीजसंकलनाचे महत्त्व विषद केले. ते म्हणाले की, प्रत्येक भव्य वृक्षाची सुरुवात एका छोट्याशा बीजापासून होते. बीज हे भविष्यातील जंगलाचे, पर्यावरणाचे आणि मानवी जीवनाच्या समृद्धीचे प्रतीक आहे. आज आपण ज्या सावलीत बसतो, ज्या वृक्षांमुळे शुद्ध हवा मिळते, ते सर्व कधीकाळी बीजांच्या रूपातच होते. त्यामुळे विविध वृक्षांच्या बियांचे संकलन करून त्या योग्य ठिकाणी रुजविणे ही काळाची गरज आहे. बीजसंकलनातून लाखो नवीन वृक्ष निर्माण होऊ शकतात आणि पर्यावरण संतुलनासाठी मोठे योगदान देता येते. त्यांनी सर्व नागरिकांना बीजसंकलन करून ती स्वतःकडे पोहोचविण्याचे आवाहन केले.
यावेळी त्यांनी “एक झाड दत्तक योजना” राबविण्याची विनंती केली. प्रत्येक व्यक्तीने दरवर्षी किमान एक झाड लावून त्याचे संगोपन करण्याची जबाबदारी स्वीकारावी, असे त्यांनी सांगितले. वृक्ष लावणे ही केवळ सुरुवात असते; त्याचे नियमित पाणी, संरक्षण आणि काळजी घेणे अधिक महत्त्वाचे आहे. जर प्रत्येक नागरिकाने आयुष्यात दरवर्षी एक झाड दत्तक घेतले तर काही वर्षांत संपूर्ण परिसर हिरवागार होऊ शकतो. पर्यावरण संवर्धनात लोकसहभाग वाढविण्यासाठी हा प्रभावी उपक्रम असल्याचे त्यांनी नमूद केले.
श्री. रविंद्र आळणे यांनी काल स्वतः २५० झाडे जंगल गार्डनमध्ये प्रस्थापित केल्याची माहिती दिली. तसेच फावडे, कुदळ, टिकाव यांसारखी एकूण ५० हत्यारे स्वखर्चाने उपलब्ध करून दिल्याचे सांगितले. प्रत्येक व्यक्तीने या मायभूमीचे ऋण फेडण्यासाठी आपल्या क्षमतेनुसार निसर्ग आणि पर्यावरणासाठी कार्य करण्याची गरज असल्याचे त्यांनी नमूद केले.
ते पुढे बोलताना संत तुकाराम महाराजांच्या “वृक्षवल्ली आम्हां सोयरे वनचरे” या अभंगाचा उल्लेख करत म्हणाले की, वृक्ष आणि निसर्ग हे आपल्या कुटुंबातील सदस्यांप्रमाणेच आहेत. झाडे आपल्याला निस्वार्थपणे प्राणवायू, फळे, फुले, औषधे, सावली आणि जीवन देतात. म्हणूनच वृक्षांशी आत्मीयतेचे नाते निर्माण करणे आवश्यक आहे. निसर्गाचे जतन म्हणजे मानवतेचे रक्षण असल्याचे सांगत त्यांनी सर्वांचे पुन्हा स्वागत केले.
यानंतर _नगरसेवक श्री. तुषारभाऊ सहाणे_ यांनी मनोगत व्यक्त केले. ते म्हणाले की, निसर्ग आणि पर्यावरणाचा समतोल राखण्यासाठी सर्वांना सोबत घेऊन सर्वोतोपरी प्रयत्न केले जातील. त्यांच्या प्रभाग क्रमांक ८ मध्ये तब्बल २००० वृक्षांच्या लागवड आणि संगोपनाची मोहीम सुरू करण्यात आल्याची माहिती त्यांनी दिली. यावेळी त्यांनी जंगल गार्डन टीम, श्री. विठ्ठल नाना वाळुंज, श्री. रविंद्र आळणे, श्री. विश्वनाथ टेमगिरे आणि मेजर डावखर यांचे विशेष कौतुक केले.
प्रमुख पाहुणे _श्री. रमेश खरमाळे सर_ यांनी आपल्या भाषणात पिंपरी चिंचवडमध्ये बोलावल्याबद्दल कृतज्ञता व्यक्त केली. ते म्हणाले की, प्रत्येक व्यक्तीला निरोगी जीवन, शुद्ध श्वास, संतुलित तापमान आणि सुरक्षित पर्यावरण मिळावे यासाठी जागतिक पर्यावरण दिन साजरा केला जातो. पृथ्वीचा पर्यावरणीय समतोल टिकविण्यासाठी वृक्ष अत्यंत आवश्यक आहेत. झाडे कार्बन डायऑक्साइड शोषून प्राणवायू देतात, तापमान नियंत्रित ठेवतात, भूजल पातळी वाढवतात आणि जैवविविधतेचे संरक्षण करतात. मानवाला जगण्यासाठी अन्न, पाणी आणि ऑक्सिजन आवश्यक असून हे सर्व वृक्षांशी जोडलेले आहे. म्हणून प्रत्येकाने घरात, टेरेसवर, शाळा, महाविद्यालय किंवा उपलब्ध जागेत वृक्ष लागवड करावी, असे आवाहन त्यांनी केले. त्यांनी जंगल गार्डनच्या सर्व कार्यकर्त्यांचे विशेष कौतुक करून शुभेच्छा दिल्या.
त्यानंतर _महापौर श्री. रवी बाबासाहेब लांडगे_ यांनी मार्गदर्शन केले. त्यांनी हरित पिंपरी चिंचवड अभियानाद्वारे शहरात हरितक्रांती घडविण्याचा संकल्प व्यक्त केला. मानवी शरीर पंचमहाभूतांनी बनलेले असून पृथ्वी (माती), आकाश (स्पंदने), अग्नी, पाणी आणि हवा (ऑक्सिजन) या घटकांचे मानवी जीवनात अनन्यसाधारण महत्त्व असल्याचे त्यांनी सांगितले. निसर्ग आणि मानवी जीवन यांचा समतोल राखण्यासाठी वृक्ष संवर्धन आवश्यक असल्याचे नमूद करत त्यांनी यावर्षी पाच लाख वृक्ष लागवड आणि संगोपनाचा संकल्प जाहीर केला. वाढत्या तापमानाबद्दल चिंता व्यक्त करत त्यांनी प्रत्येक नागरिकाने वृक्षसंवर्धनात सक्रिय सहभाग घ्यावा, असे आवाहन केले. तसेच जंगल गार्डन टीमचे विशेष अभिनंदन करून शुभेच्छा दिल्या.
यावेळी _श्री विश्वनाथ टेमगिरे_ सोबत सर्वांनी जनजागृती साठी "झाडे लावा, झाडे जगवा, देश वाचवा" अशा घोषणा दिल्या.
कार्यक्रमाच्या शेवटी _श्री. विठ्ठल नाना वाळुंज_ यांनी उपस्थितांचे आभार मानले. भूगोल फाउंडेशनच्या वृक्ष लग्न आणि वृक्ष ओटीभरण या अभिनव उपक्रमांनंतर आज सायंकाळी ६ वाजता आयोजित करण्यात आलेल्या “वृक्ष नामकरण सोहळा (बारसे)” या विशेष कार्यक्रमास उपस्थित राहण्याचे आवाहन त्यांनी केले.
जागतिक पर्यावरण दिनानिमित्त झालेला हा वृक्षारोपण सोहळा पर्यावरण संवर्धन, लोकसहभाग आणि हरित भविष्याच्या दिशेने टाकलेले एक महत्त्वपूर्ण पाऊल ठरला._