पिंपरी-चिंचवड ( शिवानंद चौगुले) : आयुष्याच्या उत्तरार्धात माणसाला सर्वाधिक गरज असते ती प्रेमाची, आपुलकीची आणि मानसिक आधाराची. अशा भावना जपत सामाजिक बांधिलकीच्या माध्यमातून ज्येष्ठांना एकत्र आणणाऱ्या ओम शांती गंगा ज्येष्ठ नागरिक संघ, महात्मा फुले नगर, पिंपरी-चिंचवड यांच्या वतीने जून महिन्यात वाढदिवस असलेल्या सभासदांचा सामूहिक अभिष्टचिंतन सोहळा अत्यंत आनंदमय, भावनिक आणि उत्साहपूर्ण वातावरणात संपन्न झाला.
भारतीय संस्कृती आणि परंपरांचे जतन करत वाढदिवस असलेल्या सर्व सत्कारमूर्तींचे पारंपारिक पद्धतीने औक्षण करण्यात आले. मंगलमय वातावरणात उपस्थित महिला भगिनींनी औक्षण करून ज्येष्ठांना दीर्घायुष्याच्या शुभेच्छा दिल्या. श्रीफळ, गुलाबपुष्प, पेढे आणि शुभेच्छांच्या वर्षावाने संपूर्ण सभागृहात एक आगळावेगळा कौटुंबिक स्नेहसोहळा अनुभवायला मिळाला.
या प्रसंगी वाढदिवस साजरा करणाऱ्या सर्व सदस्यांना तुळशीचे रोप भेट देऊन पर्यावरण संवर्धनाचा संदेश देण्यात आला. समाजाप्रती असलेली जबाबदारी आणि निसर्गसंवर्धनाची भावना जपत साजरा झालेला हा उपक्रम उपस्थितांच्या विशेष पसंतीस उतरला.
कार्यक्रमातील विशेष आकर्षण ठरले ते भारतीय सेनेतून निवृत्त झालेले आदरणीय पंडितराव बाराहाते काका यांचा ७५ वा वाढदिवस अमृत महोत्सव. मानाचा फेटा, शाल, श्रीफळ, पुष्पगुच्छ आणि पेढे देऊन त्यांचा सन्मान करण्यात आला. त्यांच्या दीर्घ आणि प्रेरणादायी जीवनप्रवासाचा गौरव करताना उपस्थितांनी टाळ्यांच्या कडकडाटात शुभेच्छांचा वर्षाव केला.
सत्कारमूर्ती म्हणून पंडित बाराहाते, झुंबर हिरडे, शिवाजी गांधीले, विठ्ठल अगवणे, सौ. महानंदा चौगुले, सौ. विमल देठे, विलास रूप टक्के, सौ. मिनाबाई डोईफोडे, रमेश बोंद्रे, चंद्रकांत देठे, विश्वास सोहनी, श्रीमती मनीषा ठोंबरे, सौ. प्रतिमा टोरपे, अशोक उमककार, धनराज भंगाळे, अनंत वांद्रे आणि गुंडुराव खन्नुकर यांचा विधिवत सत्कार करण्यात आला.
कार्यक्रमाला अनेक नातेवाईक, कुटुंबीय, मित्रपरिवार आणि शुभेच्छुक मोठ्या संख्येने उपस्थित होते. आजोबांबद्दल नातवंडांनी व्यक्त केलेले प्रेम, वडिलांविषयी मुलांनी सांगितलेल्या भावना, पत्नींबद्दल पतींनी व्यक्त केलेला जिव्हाळा आणि मित्रांनी सांगितलेल्या आठवणी यामुळे अनेकांच्या डोळ्यांच्या कडा ओलावल्या. प्रेम, स्नेह आणि कृतज्ञतेच्या या भावनिक क्षणांनी उपस्थित सर्वजण अक्षरशः भारावून गेले.
"ज्येष्ठ हे कुटुंबाचे आणि समाजाचे संस्कारकेंद्र आहेत. आयुष्यात कितीही संकटे आली तरी खंबीरपणे उभे राहून नव्या उमेदीने जगण्याची प्रेरणा त्यांनी पुढील पिढीला दिली आहे," अशी भावना अनेकांनी आपल्या मनोगतातून व्यक्त केली.
या सोहळ्याचे सूत्रसंचालन संस्थापक अध्यक्ष यशवंत गंगाराम कण्हेरे यांनी केले. तर वार्ताहर शिवानंद चौगुले यांनी आभार प्रदर्शन करत ज्येष्ठांच्या अनुभवसंपन्न जीवनातून प्रेरणा घेण्याचे आवाहन केले.
कार्यक्रमाच्या शेवटी स्वादिष्ट मासवडीसह सहभोजनाचा आस्वाद घेण्यात आला. सर्व उपस्थितांना आईस्क्रीम देऊन आनंदोत्सवाची गोड सांगता करण्यात आली.
एकूणच, केवळ वाढदिवस साजरा न होता प्रेम, संस्कार, आपुलकी, कृतज्ञता आणि कौटुंबिक नात्यांचा सुंदर संगम अनुभवायला मिळालेला हा अभिष्टचिंतन सोहळा उपस्थितांच्या कायम स्मरणात राहणारा ठरला.
– यशवंत गंगाराम कण्हेरे
संस्थापक अध्यक्ष
ओम शांती गंगा ज्येष्ठ नागरिक संघ
महात्मा फुले नगर, पिंपरी-चिंचवड, पुणे – १९.