Zomato platform fee : सण-उत्सवांच्या काळात ऑनलाइन फूड ऑर्डर करणाऱ्या ग्राहकांना झोमॅटोने मोठा धक्का दिला आहे. कंपनीने आपल्या प्लॅटफॉर्म फीमध्ये वाढ केली असून, आता प्रत्येक ऑर्डरसाठी ग्राहकांना अधिक पैसे मोजावे लागणार आहेत. आतापर्यंत ₹10 असलेली ही फी थेट ₹12 करण्यात आली आहे, ज्यामुळे फूड ऑर्डर जवळपास 20 टक्क्यांनी महाग झाली आहे.
या वाढीचा थेट परिणाम देशभरातील लाखो ग्राहकांवर होणार आहे. झोमॅटोने ही नवीन फी लागू करण्यास सुरुवात केली असून, आता जेवण, डिलिव्हरी शुल्क आणि करां व्यतिरिक्त ही रक्कम प्रत्येक ऑर्डरवर आकारली जाईल. विशेष म्हणजे, ही दरवाढ अशा वेळी करण्यात आली आहे, जेव्हा दिवाळी आणि इतर सणांमुळे ऑनलाइन फूड ऑर्डर मोठ्या प्रमाणात वाढतात. त्यामुळे, झोमॅटो कंपनीला याचा मोठा महसूल मिळू शकतो.
कंपनीच्या महसुलात वाढ होण्याची शक्यता
प्लॅटफॉर्म फी हे एक असे शुल्क असते जे कंपनी आपल्या ॲपचा वापर करण्यासाठी आणि सेवा पुरवण्यासाठी ग्राहकांकडून आकारते. झोमॅटोने गेल्या वर्षी ऑगस्टमध्ये ही फी लागू केली होती. सुरुवातीला ती ₹2 होती, त्यानंतर ती ₹3, ₹5, ₹9 आणि ₹10 पर्यंत वाढवण्यात आली होती. आता ती ₹12 पर्यंत पोहोचली आहे.
या दरवाढीमुळे कंपनीच्या महसुलात मोठी वाढ होण्याची शक्यता आहे. मात्र, याचा थेट भार ग्राहकांच्या खिशावर पडणार आहे. आधीच महागाई आणि इतर शुल्कांमुळे फूड ऑर्डरची किंमत वाढत असताना, या नवीन वाढीमुळे ग्राहकांना अधिक आर्थिक भुर्दंड सोसावा लागणार आहे. झोमॅटोच्या या निर्णयामुळे अनेक ग्राहक आश्चर्यचकित झाले असून, सोशल मीडियावर याविषयी चर्चा सुरू आहे.
डिलिव्हरी प्लॅटफॉर्मवरील वाढती स्पर्धा आणि खर्चाचा विचार करता, कंपनीने आपल्या नफ्याचे प्रमाण वाढवण्यासाठी हा निर्णय घेतला असावा, असे विश्लेषकांचे म्हणणे आहे. मात्र, यामुळे ग्राहकांवर ताण वाढला असून, याचा परिणाम ऑर्डरच्या संख्येवर होतो का, हे पाहणे महत्त्वाचे ठरेल.
Zomato-shocks-customers-Now-you-will-have-to-pay-more-on-every-order