पिंपरी चिंचवड - पिंपळे सौदागर येथे महाराष्ट्र राज्याचे उपमुख्यमंत्री आणि पालकमंत्री अजित पवार यांच्या संकल्पनेतून साकार झालेल्या, आशिया खंडातील सर्वात मोठ्या क्लायंबिंग वॉल असलेल्या योगा पार्कमध्ये २९ व्या आयएमएफ फाऊंडेशन पश्चिम विभाग अंतर्गत राष्ट्रीय अजिंक्यपद क्लायंबिंग स्पर्धा २०२५ चे आयोजन करण्यात आले आहे. या स्पर्धेचे उद्घाटन विरोधी पक्षनेते आणि नगरसेवक विठ्ठल उर्फ नाना काटे यांच्या हस्ते संपन्न झाले.
या राष्ट्रीय स्पर्धेत पश्चिम विभागातील १५० खेळाडू सहभागी झाले आहेत. पिंपळे सौदागर येथील या योगा पार्कमध्ये १८ मीटर उंचीची बोल्डरिंग वॉल, २१ मीटर उंचीची स्पीड वॉल आणि २१ मीटर उंचीची लीड वॉल यांसारख्या अत्याधुनिक सुविधा उपलब्ध आहेत. या सुविधांमुळे येथील खेळाडूंना राष्ट्रीय स्तरावर उत्कृष्ट कामगिरी करण्यास मदत होईल, असे मत व्यक्त करण्यात येत आहे. योगा पार्कमध्ये लहान मुलांसाठी खेळणी आणि ज्येष्ठांसाठी व्यायामाची स्वतंत्र व्यवस्था देखील आहे.
उद्घाटन प्रसंगी माजी नगरसेविका निर्मला कुटे, आयएमएफ फाऊंडेशनचे चेअरमन के. सरस्वती, सेक्रेटरी श्रीकृष्ण कडुस्कर, सदस्य सुरेंद्र शेळके, निवृत्त डीजीपी ॲड. नरेंद्र निकम, आणि निवृत्त लष्कर अधिकारी देवांग नाईक यांच्यासह इतर मान्यवर आणि खेळाडू उपस्थित होते.