मुंबई (वर्षा चव्हाण) : राज्यातील हवामानात बदल होण्यास सुरुवात झाली असून १ जूनपासून सुरू होणाऱ्या आठवड्यात अनेक भागांमध्ये दुपारनंतर ढगाळ वातावरण आणि वादळी पावसाची शक्यता व्यक्त करण्यात आली आहे. मात्र हा पाऊस मान्सूनपूर्व स्वरूपाचा असून त्याचा मान्सूनच्या आगमनाशी कोणताही संबंध नसल्याचे स्पष्ट करण्यात आले आहे. सध्याच्या हवामान परिस्थितीनुसार राज्यातील बहुतांश भागांमध्ये किमान १० जूनपर्यंत मान्सून दाखल होण्याची शक्यता नसल्याचा अंदाज व्यक्त करण्यात आला आहे.
हवामान विभागाच्या माहितीनुसार, आगामी आठवड्यात प्रामुख्याने विदर्भ, मराठवाडा, मध्य महाराष्ट्र आणि खानदेशातील काही भागांमध्ये दुपारनंतर ढगांची निर्मिती होऊन तुरळक ते मध्यम स्वरूपाचा वादळी पाऊस पडू शकतो. कोकण किनारपट्टीवरही काही ठिकाणी पावसाची शक्यता आहे. या बदलामुळे मे महिन्यात जाणवलेल्या तीव्र उष्णतेत काही प्रमाणात घट होण्याची अपेक्षा आहे.
तथापि, विदर्भातील विशेषतः पूर्व विदर्भातील काही जिल्ह्यांमध्ये उष्णतेचा प्रभाव कायम राहणार असून कमाल तापमान ४० अंश सेल्सिअसच्या वर राहण्याची शक्यता आहे. त्यामुळे नागरिकांनी उष्माघातासह बदलत्या हवामानापासून सावध राहण्याचे आवाहन करण्यात आले आहे.
दरम्यान, संभाव्य वादळी पावसामुळे अनेक शेतकरी पेरणीसाठी तयारी करत असले तरी कृषी विभागाने संयम बाळगण्याचा सल्ला दिला आहे. मान्सूनचे आगमन अद्याप झाले नसल्याने आणि पडणारा पाऊस अनियमित व अल्पकालीन असण्याची शक्यता असल्याने केवळ या पावसाच्या आधारे पेरणी करण्याची घाई करू नये, असे आवाहन करण्यात आले आहे. मान्सून स्थिर झाल्यानंतरच पेरणीचा निर्णय घेणे शेतकऱ्यांच्या हिताचे ठरणार असल्याचे कृषी तज्ज्ञांचे मत आहे.
याशिवाय, वादळी पावसासोबत विजांच्या कडकडाटाची शक्यता लक्षात घेता नागरिकांनी आणि शेतकऱ्यांनी विशेष खबरदारी घेण्याचे निर्देश देण्यात आले आहेत. विजांच्या कडकडाटाच्या वेळी झाडाखाली, टिनशेडखाली किंवा उघड्या जागेत उभे राहणे टाळावे. तसेच विद्युत ट्रान्सफॉर्मर, वीज खांब आणि विद्युत वाहिन्यांच्या जवळ जाणे धोकादायक ठरू शकते. पाळीव जनावरांनाही सुरक्षित ठिकाणी ठेवण्याचा सल्ला देण्यात आला आहे.
कृषी आणि आपत्ती व्यवस्थापन विभागांनी बदलत्या हवामानाच्या पार्श्वभूमीवर नागरिकांनी सतर्क राहावे, अधिकृत हवामान अंदाजावर लक्ष ठेवावे आणि आवश्यक ती प्रतिबंधात्मक उपाययोजना कराव्यात, असे आवाहन केले आहे. राज्यात मान्सूनच्या आगमनाबाबत पुढील काही दिवसांत परिस्थिती अधिक स्पष्ट होण्याची शक्यता आहे.