‘सांस्कृतिक वार्तापत्र’च्या ‘हिंदू हुतात्मे’ विशेषांकाचे उत्साहात प्रकाशन
पिंपरी चिंचवड : भारतीय स्वातंत्र्यलढा, राष्ट्ररक्षण आणि हिंदू समाजाच्या अस्मितेसाठी आपल्या प्राणांचे बलिदान देणाऱ्या ज्ञात-अज्ञात हुतात्म्यांचा इतिहास समाजासमोर आणणे, त्यांच्या त्यागाची जाणीव नव्या पिढीला करून देणे आणि राष्ट्रभक्तीची प्रेरणा जागविणे ही काळाची गरज आहे, असे प्रतिपादन सह्याद्री प्रतिष्ठान हिंदुस्तानचे संस्थापक-अध्यक्ष डॉ. श्रमिक चंद्रशेखर गोजमगुंडे यांनी केले.
सांस्कृतिक वार्तापत्र, पुणे आणि स्वातंत्र्यवीर सावरकर मंडळ यांच्या संयुक्त विद्यमाने आयोजित करण्यात आलेल्या ‘हिंदू हुतात्मे’ विशेषांकाच्या प्रकाशन सोहळ्यात ते प्रमुख वक्ते म्हणून बोलत होते. शनिवारी (दि. २२) चिंचवड येथे झालेल्या या कार्यक्रमास सामाजिक, सांस्कृतिक आणि राष्ट्रसेवेच्या क्षेत्रातील मान्यवरांसह राष्ट्रप्रेमी नागरिकांची मोठी उपस्थिती होती.
कार्यक्रमाच्या प्रारंभी मान्यवरांच्या शुभहस्ते स्वातंत्र्यवीर विनायक दामोदर सावरकर आणि भारतमाता यांच्या प्रतिमेचे पूजन करून अभिवादन करण्यात आले. त्यानंतर उपस्थित मान्यवरांचे स्वागत, परिचय व सन्मान करण्यात आला.
कार्यक्रमाच्या व्यासपीठावर पिंपरी-चिंचवड जिल्ह्याचे संघचालक श्री. विनोद बन्सल, सांस्कृतिक वार्तापत्राचे संपादक श्री. मिलिंद शेटे, सह्याद्री प्रतिष्ठान हिंदुस्तानचे संस्थापक-अध्यक्ष डॉ. श्रमिक चंद्रशेखर गोजमगुंडे, स्वातंत्र्यवीर सावरकर मंडळाचे अध्यक्ष श्री. विजयशंकर कर्ता, रवींद्रनाथ ठाकूर सार्वजनिक ग्रंथालयाचे अध्यक्ष श्री. विश्वास करंदीकर आणि राष्ट्रीय स्वयंसेवक संघाचे विभाग कार्यवाह श्री. मुकुंद कुलकर्णी आदी मान्यवर उपस्थित होते.
हुतात्म्यांचा इतिहास समाजासमोर आणण्याचा संकल्प
प्रास्ताविकात सांस्कृतिक वार्तापत्राचे संपादक मिलिंद शेटे यांनी विशेषांकाच्या प्रकाशनामागील भूमिका स्पष्ट केली. भारतीय इतिहासात अनेक वीरांनी राष्ट्रासाठी आपले जीवन समर्पित केले. त्यापैकी अनेक महात्मे, क्रांतिकारक आणि हुतात्म्यांचे योगदान इतिहासाच्या मुख्य प्रवाहात पुरेशा प्रमाणात समाजासमोर आलेले नाही.
अशा ज्ञात-अज्ञात हुतात्म्यांचा इतिहास समाजासमोर आणणे, त्यांनी केलेल्या त्यागाची आणि योगदानाची जाणीव पुढील पिढीला करून देणे आणि त्यांच्या राष्ट्रनिष्ठेची प्रेरणा समाजात जिवंत ठेवणे हा ‘सांस्कृतिक वार्तापत्रा’चा प्रमुख उद्देश असल्याचे शेटे यांनी सांगितले.
आजपर्यंत सांस्कृतिक वार्तापत्राच्या माध्यमातून शेकडो देशप्रेमी व्यक्तिमत्त्वांचा इतिहास आणि त्यांचे कार्य समाजासमोर आणण्याचे काम करण्यात आले आहे. इतिहासातील अशी प्रेरणादायी पाने सातत्याने समाजासमोर आणणे आवश्यक असल्याचेही त्यांनी नमूद केले.
मान्यवरांच्या हस्ते ‘हिंदू हुतात्मे’ विशेषांकाचे प्रकाशन
यानंतर उपस्थित मान्यवरांच्या शुभहस्ते ‘हिंदू हुतात्मे’ विशेषांकाचे प्रकाशन करण्यात आले. या विशेषांकाच्या माध्यमातून राष्ट्र, धर्म आणि समाजासाठी बलिदान देणाऱ्या विविध हुतात्म्यांच्या जीवनकार्याला उजाळा देण्यात आला असून, इतिहासातील दुर्लक्षित आणि अल्पपरिचित वीरांचे कार्य नव्या पिढीपर्यंत पोहोचविण्याचा प्रयत्न करण्यात आला आहे.
श्रीरामापासून सावरकरांपर्यंत राष्ट्रनिष्ठेची अखंड परंपरा
प्रमुख वक्ते डॉ. श्रमिक चंद्रशेखर गोजमगुंडे यांनी आपल्या मार्गदर्शनात हिंदुस्थानच्या इतिहासातील अनेक थोर वीरांच्या कार्याचा विस्तृत आढावा घेतला.
हिंदुस्थानच्या स्वातंत्र्यासाठी, हिंदुत्वाची परंपरा आणि सांस्कृतिक ओळख अबाधित ठेवण्यासाठी तसेच राष्ट्राच्या रक्षणासाठी असंख्य वीरांनी संघर्ष केला. श्रीरामापासून स्वातंत्र्यवीर सावरकरांपर्यंत राष्ट्रनिष्ठेची ही परंपरा अखंडपणे पुढे आली आहे, असे त्यांनी सांगितले.
यावेळी त्यांनी महाराणा प्रताप, छत्रपती शिवाजी महाराज, धर्मवीर छत्रपती संभाजी महाराज, पेशवे, स्वातंत्र्यवीर सावरकर तसेच विविध राष्ट्रसेवक आणि राष्ट्रीय स्वयंसेवक संघाच्या कार्यकर्त्यांच्या योगदानाचा संदर्भ देत इतिहासातील अनेक ज्ञात-अज्ञात पैलूंवर प्रकाश टाकला.
इतिहास हा केवळ भूतकाळातील घटनांचा संग्रह नसून तो समाजाला वर्तमानात दिशा आणि भविष्यासाठी प्रेरणा देणारा असतो. राष्ट्रासाठी बलिदान देणाऱ्या वीरांचे कार्य नव्या पिढीसमोर सातत्याने मांडले गेले पाहिजे. या दृष्टीने ‘सांस्कृतिक वार्तापत्र’चे कार्य महत्त्वपूर्ण असून, हिंदुस्थानचा प्रेरणादायी इतिहास समाजापुढे आणण्याचे काम होत असल्याचा अभिमान वाटतो, असे गौरवोद्गार डॉ. गोजमगुंडे यांनी काढले.
प्रभावी सूत्रसंचालनाने कार्यक्रमाला रंगत
संपूर्ण कार्यक्रमाचे सूत्रसंचालन सौ. सुप्रिया होनप यांनी प्रभावीपणे केले. त्यांनी कार्यक्रमातील विविध सत्रांची सांगड घालत मान्यवरांचा परिचय, स्वागत, सत्कार, विशेषांक प्रकाशन आणि प्रमुख वक्त्यांच्या मार्गदर्शनाचा क्रम अत्यंत शिस्तबद्ध व ओघवत्या शैलीत पार पाडला. त्यांच्या प्रभावी सूत्रसंचालनामुळे कार्यक्रमाला सुबकता आणि प्रसन्न वातावरण लाभले.
कार्यक्रमाच्या शेवटी सांस्कृतिक वार्तापत्राचे पश्चिम महाराष्ट्र प्रांत विक्री-विपणन अधिकारी श्री. निखिल वझे यांनी आभार मानले.
यानंतर सौ. सुप्रिया पांडे यांच्या नेतृत्वाखाली संपूर्ण ‘वंदे मातरम्’ गायन करण्यात आले आणि राष्ट्रभावनेने कार्यक्रमाची सांगता झाली.
हुतात्म्यांच्या त्यागाचे स्मरण, इतिहासातील दुर्लक्षित वीरांच्या कार्याची ओळख आणि नव्या पिढीमध्ये राष्ट्रनिष्ठेची भावना जागविण्याच्या उद्देशाने आयोजित करण्यात आलेला हा ‘हिंदू हुतात्मे’ विशेषांक प्रकाशन सोहळा प्रेरणादायी आणि उत्साहपूर्ण वातावरणात संपन्न झाला.
वार्ताहर : शिवानंद चौगुले
महाराष्ट्र जनभूमी न्यूज