चिंचवडमध्ये दिशा सोशल फाउंडेशनच्या विशेष मुलाखतीसाठी सुमारे ३ हजार नागरिकांची उपस्थितीपिंपरी चिंचवड : चिंचवड येथील रामकृष्ण मोरे प्रेक्षागृहात दिशा सोशल फाउंडेशनच्या वतीने आयोजित करण्यात आलेल्या आयुक्त तुकाराम मुंढे यांच्या विशेष मुलाखतीच्या कार्यक्रमाला तरुणाईसह ज्येष्ठ नागरिकांचा उत्स्फूर्त प्रतिसाद मिळाला. या कार्यक्रमाला सुमारे ३ हजार तरुण, नागरिक आणि ज्येष्ठांनी उपस्थिती लावून तुकाराम मुंढे यांचे विचार ऐकले.
यावेळी तुकाराम मुंढे यांनी जीवनातील यश, शिस्त, सामाजिक बांधिलकी, शिक्षण आणि प्रामाणिकपणाचे महत्त्व यावर मनमोकळेपणाने संवाद साधला.
“आपली ओळख ही आपल्या पदामुळे, संपत्तीमुळे किंवा प्रसिद्धीमुळे नव्हे, तर आपल्या प्रामाणिकपणामुळे झाली पाहिजे. आयुष्यात कोणत्याही परिस्थितीत प्रामाणिकपणा सोडू नका,” असा संदेश त्यांनी उपस्थित तरुणांना दिला.
आजच्या स्पर्धेच्या युगात यश मिळवताना मूल्यांची जपणूक करणे आवश्यक आहे. केवळ मोठे पद मिळवणे किंवा आर्थिकदृष्ट्या सक्षम होणे म्हणजे यश नव्हे; तर आपल्या कर्तृत्वातून समाजासाठी सकारात्मक योगदान देणे आणि चारित्र्य जपणे हे खरे यश आहे, असे त्यांनी सांगितले.
गुणवंत विद्यार्थ्यांचा आणि खेळाडूचा सन्मान
कार्यक्रमादरम्यान विविध क्षेत्रात उल्लेखनीय कामगिरी करणाऱ्या विद्यार्थ्यांचा विशेष सन्मान करण्यात आला. स्कॉलरशिप परीक्षेत प्रथम क्रमांक मिळवलेल्या विद्यार्थ्याचा तसेच जागतिक पातळीवर देशाचे प्रतिनिधित्व करून उल्लेखनीय कामगिरी करणाऱ्या मुलीचा सन्मान करण्यात आला.
गुणवंत विद्यार्थी आणि खेळाडूंच्या कर्तृत्वाचा गौरव करून त्यांच्या यशाला प्रोत्साहन देण्याचा उपक्रम हा कार्यक्रमाचा विशेष भाग ठरला. उपस्थित तरुणांनीही या सन्मानाला उत्स्फूर्त प्रतिसाद दिला.
तरुणांसाठी प्रेरणादायी संवाद
तुकाराम मुंढे यांच्या स्पष्टवक्तेपणा, शिस्तप्रियता आणि सामाजिक दृष्टिकोनामुळे त्यांच्या मुलाखतीला विशेष महत्त्व प्राप्त झाले. त्यांच्या विचारांमधून तरुणांना मेहनत, शिस्त, प्रामाणिकपणा आणि जबाबदारीची जाणीव यांचा संदेश मिळाला.
सुमारे तीन हजार नागरिकांची उपस्थिती ही चिंचवड परिसरातील नागरिकांचा सकारात्मक आणि प्रेरणादायी विचारांकडे असलेला कल दर्शवणारी ठरली.
दिशा सोशल फाउंडेशनने आयोजित केलेल्या या विशेष मुलाखतीच्या माध्यमातून “यशस्वी होण्यापेक्षा चांगला माणूस होणे महत्त्वाचे” हा संदेश समाजापर्यंत पोहोचला.
प्रामाणिकपणा, कर्तृत्व आणि सामाजिक जबाबदारी या मूल्यांवर उभे राहणारी तरुण पिढीच सक्षम आणि सशक्त समाजाची निर्मिती करू शकते, असा सूर या कार्यक्रमातून उमटला.
— डॉ. किशोर आण्णासाहेब थोरात