क्रिकेटच्या मैदानावर काही खेळाडू धावांचा पाऊस पाडतात, काही विक्रम मोडतात, तर काही आपल्या खेळाच्या शैलीने चाहत्यांच्या मनात कायमचे घर करतात. भारतीय क्रिकेटला आता असाच एक नवा चेहरा मिळाल्याची चर्चा सर्वत्र रंगू लागली आहे. तो म्हणजे वैभव सूर्यवंशी — भारतीय क्रिकेटचा नवा ‘बेबी बॉस’.
वैभवचे व्यक्तिमत्त्व पाहिले तर तो एखाद्या सर्वसामान्य, निरागस आणि लाजाळू मुलासारखा वाटतो. मैदानाबाहेर कॅमेरा समोर आला की त्याच्या चेहऱ्यावर संकोच स्पष्ट दिसतो. मुलाखतींमध्ये तो कमी बोलतो, प्रसिद्धीपासून दूर राहतो. मात्र एकदा हातात बॅट घेत मैदानावर उतरला की त्याचे रूप पूर्णपणे बदलते.
समोर जगातील अव्वल वेगवान गोलंदाज असोत किंवा अनुभवी आंतरराष्ट्रीय दर्जाचे आक्रमण, वैभव त्यांच्यावर कुठलाही दबाव न घेता तुटून पडतो. त्याच्या फलंदाजीत आत्मविश्वास, धाडस आणि आक्रमकता यांचे विलक्षण मिश्रण दिसते. पहिल्या चेंडूपासूनच गोलंदाजांवर हल्ला चढवण्याची त्याची वृत्ती त्याला इतरांपेक्षा वेगळे स्थान मिळवून देते.
अनेक फलंदाज शतकाच्या जवळ पोहोचल्यानंतर सावध होतात. एक-दोन धावा काढून शतक पूर्ण करण्याचा प्रयत्न करतात. मात्र वैभवची मानसिकता वेगळी आहे. तो नव्वदीत पोहोचल्यावरही आपल्या नैसर्गिक खेळाशी तडजोड करत नाही. संघासाठी धावा करणे आणि सामन्यावर वर्चस्व गाजवणे हेच त्याचे ध्येय असते. त्यामुळे शतकाच्या उंबरठ्यावर असतानाही तो मोठे फटके खेळण्यास मागेपुढे पाहत नाही.
याच वृत्तीमुळे कधी तो शतकापासून काही धावा दूर असताना बाद होतो. मात्र त्या क्षणी त्याच्या चेहऱ्यावर दिसणारी निराशा आणि डोळ्यांतील भावना त्याच्या क्रिकेटवरील प्रेमाची साक्ष देतात. स्वतःच्या विकेटचे त्याला किती महत्त्व आहे आणि संघासाठी मोठी खेळी करण्याची त्याची किती तीव्र इच्छा आहे, हे त्यातून स्पष्ट होते.
अवघ्या दोन आयपीएल हंगामांत वैभवने स्वतःची वेगळी ओळख निर्माण केली आहे. अनेक युवा खेळाडू लीगमध्ये येतात, काही सामने खेळतात आणि नंतर विस्मृतीत जातात. पण वैभवने आपल्या निर्भीड फलंदाजीने आणि सातत्यपूर्ण कामगिरीने क्रिकेटप्रेमींना त्याची दखल घ्यायला भाग पाडले आहे.
त्याच्या खेळात आधुनिक टी-२० क्रिकेटची आक्रमकता आहे, पण त्याचबरोबर मोठी खेळी करण्याची क्षमता आणि भूकही आहे. त्यामुळे तो केवळ मनोरंजन करणारा फलंदाज नाही, तर भविष्यात भारतीय क्रिकेटचा महत्त्वाचा आधारस्तंभ ठरू शकतो, अशी आशा क्रिकेट जाणकार व्यक्त करत आहेत.
भारतीय क्रिकेटला अनेक वर्षांपूर्वी एक ‘बॉस’ मिळाला होता, ज्याने आपल्या स्फोटक फलंदाजीने जग जिंकले. आता त्याच धाटणीचा, पण स्वतःची वेगळी ओळख निर्माण करणारा एक नवा ‘बेबी बॉस’ भारतीय क्रिकेटला मिळाल्याची भावना चाहत्यांमध्ये निर्माण झाली आहे.
वैभव सूर्यवंशीचा प्रवास अजून खूप मोठा आहे. अनेक आव्हाने, अनेक परीक्षा त्याच्या पुढे उभ्या राहतील. मात्र त्याची निडर वृत्ती, अफाट प्रतिभा आणि क्रिकेटबद्दलची प्रचंड तळमळ पाहता भारतीय क्रिकेटच्या भविष्यातील मोठ्या तारकांमध्ये त्याचे नाव निश्चितपणे घेतले जाईल.
सध्या तरी एवढेच म्हणावे लागेल — भारताला त्याचा नवा ‘बेबी बॉस’ सापडला आहे.
विवेक कुलकर्णी